Տոն, որ տոն է չափի գիտակցումով

Տոնական առաջին օրերին մեզնից ոչ բոլորն են հետևում հույն մեծ փիլիսոփա-բժշկապետերից մեկի թևավոր դարձած ասույթին.«Եթե ուզում ես կյանքդ երկար լինի, կարճացրու ճաշից սեղանը» և, արդյունքում, հաճախանում են շտապօգնության հեռախոսազանգերը, սրվում կամ գլուխ են բարձրացնում սիրտ-անոթային, ստամոքս-աղիքային և էլի մի շարք հիվանդություններ:

Այս առումով ի՞նչ վիճակագրություն է արձանագրվել 2013 թվականի առաջին օրերին, ինչպիսի՞ն է եղել շտապօգնության ծառայության աշխատակիցների օգնությունն այն քաղաքացիներին:

Մեզ հետ զրույցի ժամանակ Երևանի «Շտապօգնություն» ՓԲԸ-ի տնօրեն Թագուհի Ստեփանյանը ներկայացրեց մի վիճակագրություն, որը  թե շտապօգնության կանչերի, թե սննդային թունավորումների, թե վնասվածքների թվի առումով ավելի քան հուսադրող է` նախորդ տարվա նույն ժամանակահատվածի համեմատությամբ:

Մի կարևոր հանգամանք ևս. Ամանորին նախորդած օրերին մայրաքաղաքում և հանրապետության ամբողջ տարածքում առատ ձյուն տեղաց , իսկ հետագա օրերի սառնամանիքներն ավելի հավանական դարձրին ազգաբնակչության կոտրվածքներ և վնասվածքներ ստանալու հավանականությունը:

Այսպես. 2013 թվականի հունվարի 1-17-ն ընկած օրերի ընթացքում գրանցվել է 10 հազարից ավելի կանչ, հոսպիտալացվել մոտ 2000 մարդ: Մանկական կանչերի թիվը եղել է 800, հոսպիտալացվել 200-ից ավելի 136 երեխա: Ընդ որում, Ամանորի առաջին 24 ժամերի կանչերի թիվը 75-ով պակաս է նախորդ տարվա համեմատությամբ: Իսկ արդեն  հունվարի 2-ի կանչերը, 2012-ի համեմատությամբ, պակաս են եղել 111-ով:

Ինչպես նշեց շտապօգնության ծառայության տնօրենը, տոնական և հետտոնական առաջին մի քանի օրերի կանչերի առյուծի բաժինը, ինչպես միշտ, բաժին է ընկնում սիրտ-անոթային, ստամոքս-աղիքային, զարկերակային արյան  բարձր ճնշմամբ տառապողներին: Բնականաբար, չափից ավելի ուտելը, ճարպոտ ուտեստներն ու առատ ըմպելիքները (հատկապես, ոգելից) պարարտ հող են ստեղծում վերոհիշյալ հիվանդությունների սրման, մասնավորապես, սրտամկանի կաթվածի, ստամոքսի խոցի և այլ կարգի բորբոքումների համար:

Ժամանակին շտապօգնություն է հասցվել փողոցում և տանը արձանագրված կենցաղային վնասվածքներ ստացած, մարմնի բարձր ջերմություն ունեցող, սուր շնչառական խնդիրներ ունեցող մարդկանց: Նրանցից շուրջ երկու տասնյակը տեղափոխվել են հիվանդանոց` հետագա բուժում ստանալու նպատակով:

Թագուհի Ստեփանյանը փաստեց, որ 2013 թվականի առաջին տասնօրյակում սննդային թունավորումներով ոչ մի մարդ չի հոսպիտալացվել: Եղել են առանձին դեպքեր, որ ավելորդ կամ փոքր-ինչ հնացած սնունդն ուղղակի սրացումներ է առաջացրել ստամոքս-աղիքային խնդիրներ ունեցող առանձին քաղաքացիների շրջանում, ովքեր կարճ ժամանակ անց նորմալ ինքնազգացողություն են ունեցել:

Տնօրենի հավաստմամբ, տոնական և հետտոնական օրերին մայրաքաղաքի «Կենտրոն» ենթակայանի և մյուս համայնքների շտապօգնության մեքենաները, ինչպես պահանջում է չափորոշիչը, 7-15 րոպեի ընթացքում եղել են «կանչի» վայրում (դժբախտաբար, եղել են նաև մի քանի կեղծ զանգեր)` պատշաճ օգնություն ցուցաբերելով բուժօգնության կարիք ունեցող քաղաքացիներին:

Սա նաև ապացույց է այն բանի, որ Հայաստանը ժամանակին է իրականացրել բուժօգնության արդիականացման միջազգային ծրագրերը. մայրաքաղաքի և բոլոր մարզերի համար ձեռք են բերվել շտապօգնության արդիական սարքավորումներով (նաև սրտագրության) հագեցված մեքենաներ, բուժանձնակազմը և վարորդները վերապատրաստման հատուկ դասընթացներ են անցել, ծառայությունը, ըստ համապատասխան չափորոշիչների, ապահովված է դեղորայքով:

Մի կարևոր հանգամանք ևս. շտապօգնության ծառայության բժիշկ-կարգավարները կանչն ընդունելուց հետո, ռացիաների (որոնց «մայրերը» գտնվում են մայրաքաղաքի բոլոր տարածքային շրջանների կլինիկական խոշոր հիվանդանոցներում) միջոցով, անհրաժեշտության դեպքում, հաղորդում են հիվանդի վիճակը ներկայացնող տվյալներ` վիրահատության պատրաստելու նպատակով:Սա USAID ծրագրի իրականացման լավագույն ապացույցներից մեկն է:

2013-ը մտել է իր իրավունքների մեջ: Մեր քաղաքացիներին ցանկանանք հաջողակ տարի և ամենակարևորը` առողջություն, ինչի վերահսկողությունը շատ դեպքերում մեր ձեռքում է:

Հարցեր, պատասխաններ, մեկնաբանություններ